ایڈیشنل ایس پی جناب ایم ڈی ریاض الحق، آر ڈی او رمیش، ڈی ایس پی این۔ لنگیا کے ہمرہ نارائن پیٹ، اٹکور، مکتھلاور کرشنا کا دورہ
نارائن پیٹ 11 ستمبر(سماجی خبریں): گنیش تہوار کے موقع پر مورتیوں کے وسرجن کو پُرامن اور محفوظ بنانے کے لیے ضلع انتظامیہ اور پولیس محکمہ کی جانب سے پیشگی اقدامات کیے جا رہے ہیں۔ اسی سلسلے میں عہدیداروں نے جمعہ کو ضلع کے مختلف وسرجن مقامات کا دورہ کرتے ہوئے پانی کی سطح اور حفاظتی انتظامات کا جائزہ لیا۔
ایڈیشنل ایس پی جناب ایم ڈی ریاض الحق، آر ڈی او رمیش، ڈی ایس پی این۔ لنگیا اور مختلف محکموں کے عہدیداروں نے نارائن پیٹ ضلع مرکز کے کونڈاریڈی پلی تالاب، اُٹکور کے بڑے تالاب، مکتھل دندو مولہ تالاب اور کرشنا میں دریائے کرشنا کے علاقوں کا معائنہ کیا۔
دریائے کرشنا یا دیگر متبادل انتظامات پر غور
عہدیداروں نے بتایا کہ بعض تالابوں میں پانی کی سطح کم ہونے کے باعث بڑے گنیش مجسموں کے وسرجن کے لیے دریائے کرشنا یا دیگر متبادل انتظامات پر غور کیا جا رہا ہے۔ اس سلسلے میں اعلیٰ عہدیداروں سے مشاورت کے بعد جلد فیصلہ کیا جائے گا۔
معائنے کے دوران پانی کی گہرائی، وسرجن مقامات کی حفاظت، روشنی کا انتظام، صفائی، کرینوں کی دستیابی، بیریکیڈنگ، ٹریفک، پارکنگ اور عوام کے داخلے و اخراج کے راستوں کا جائزہ لیا گیا۔ عہدیداروں نے رات کے وقت بھی مناسب برقی و روشنی کے انتظامات اور تالابوں کے اطراف صفائی برقرار رکھنے کی ہدایت دی۔
ایڈیشنل ایس پی جناب ریاض الحق نے کہا کہ ضلع کلکٹر سی ایچ پرنیکا اور ایس پی ڈاکٹر وینیت کی ہدایات پرگنیش وسرجن مقامات کا معائنہ کیا گیا ہے۔ بڑے مجسموں کے لیے دریائے کرشنا یا تالابوں کے گہرے مقامات کی نشاندہی کرکے مناسب انتظامات کیے جائیں گے۔
انہوں نے کہا کہ گنیش وسرجن کو پُرامن اور محفوظ بنانے کے لیے پولیس، ریونیو، بلدیہ، برقیات اور آر اینڈ بی سمیت تمام متعلقہ محکمے باہمی تال میل کے ساتھ کام کر رہے ہیں۔ عوام اور گنیش منڈپوں کے منتظمین سے اپیل کی گئی کہ وہ پولیس اور انتظامیہ سے مکمل تعاون کرتے ہوئے وسرجن پروگرام کو کامیاب بنائیں۔