حیدرآباد کے نیلوفر اسپتال سے ماہر ڈاکٹروں کی خصوصی ٹیم نارائن پیٹ پہنچ کر تحقیقات میں مصروف
نارائن پیٹ یکم ستمبر(سماجی خبریں): نارائن پیٹ سرکاری اسپتال میں حالیہ دنوں مسلسل پیش آنے والے اموات کے واقعات پر حکومت نے فوری ردِعمل ظاہر کرتے ہوئے جامع تحقیقات کا آغاز کر دیا ہے۔ واقعات کی حقیقت سامنے لانے اور اموات کے اسباب کا پتہ چلانے کے لیے حیدرآباد کے نیلوفر اسپتال سے ماہر ڈاکٹروں کی ایک خصوصی ٹیم نارائن پیٹ روانہ کی گئی ہے۔
تحقیقاتی ٹیم میں ڈاکٹر بابوراؤ سرجن ماہر اظفال اور ڈاکٹر کویتا پیڈیاٹرک پروفیسر شامل ہیں۔ دونوں ماہرین حیدرآباد کے نیلوفر اسپتال سے وابستہ بچوں کے امراض کے ماہر ڈاکٹر ہیں۔
خصوصی طبی ٹیم نے نارائن پیٹ سرکاری اسپتال کے سپرنٹنڈنٹ ڈاکٹر کے. سمپت کمار سنگھ، ای این ٹی ماہر کی موجودگی میں تحقیقات کا آغاز کیا۔ ٹیم نے اسپتال میں فراہم کی جانے والی طبی سہولیات، مریضوں کو دی جانے والی طبی خدمات و علاج کی تفصیلات اور حالیہ اموات کا باعث بننے والے حالات کا تفصیلی جائزہ لیا۔
تحقیقاتی ٹیم اپنی جانچ مکمل کرنے کے بعد اس سلسلے میں ایک جامع رپورٹ حکومت کو پیش کرے گی۔ حکومت کی جانب سے واضح کیا گیا ہے کہ خصوصی طبی ٹیم کی رپورٹ کی بنیاد پر مزید کارروائی کا فیصلہ کیا جائے گا۔
نارائن پیٹ سرکاری اسپتال میں مسلسل اموات کے واقعات کے پس منظر میں حکومت کی جانب سے ماہر ڈاکٹروں کی ٹیم کے ذریعے تحقیقات شروع کیے جانے سے ان واقعات کی اصل وجوہات سامنے آنے کی توقع کی جا رہی ہے۔