نارائن پیٹ :قومی لوک عدالت سے عوام بھرپور استفادہ کریں: ایس پی ڈاکٹر وینیت

نارائن پیٹ، 5 ستمبر 2026: نارائن پیٹ ضلع کے نارائن پیٹ، کوسگی اور مکتھل کی عدالتوں میں 12 ستمبر، بروز ہفتہ منعقد ہونے والی قومی لوک عدالت سے عوام بھرپور استفادہ کریں۔ یہ اپیل ضلع سپرنٹنڈنٹ آف پولیس ڈاکٹر وینیت، آئی پی ایس نے کی۔

ایس پی ڈاکٹر وینیت نے کہا کہ لوک عدالت کے ذریعے باہمی رضامندی سے قابلِ تصفیہ مقدمات کو دونوں فریقین کی رضامندی کے ساتھ تیزی سے حل کرنے کا موقع فراہم کیا جاتا ہے۔ انہوں نے کہا کہ عدالتوں میں طویل عرصے سے زیرِ التوا تنازعات کو دونوں فریق باہمی سمجھوتے اور مفاہمت کے ذریعے جلد حل کروا سکتے ہیں۔

انہوں نے بتایا کہ لوک عدالت میں قابلِ راضی نامہ فوجداری مقدمات، دیوانی تنازعات، جائیداد کی تقسیم سے متعلق معاملات، خاندانی اور ازدواجی تنازعات، بینک ریکوری کیسز، سائبر مقدمات، بجلی چوری سے متعلق مقدمات اور چیک باؤنس کیسز سمیت دیگر قابلِ تصفیہ معاملات کو حل کیا جا سکتا ہے۔

ایس پی نے کہا کہ معمولی تنازعات کو طول دے کر بڑے اختلافات میں تبدیل کرنے سے دونوں فریقین کا وقت اور پیسہ ضائع ہونے کے ساتھ ساتھ ذہنی دباؤ بھی بڑھتا ہے۔ اس لیے باہمی گفتگو، مفاہمت اور رضامندی کے ذریعے مسائل کا حل تلاش کرنا ایک خوشگوار اور پُرامن ماحول برقرار رکھنے میں معاون ثابت ہوگا۔

مفاہمت کا راستی اختیار کریں

انہوں نے کہا کہ ’’مفاہمت کا راستہ ہی بہترین راستہ ہے‘‘ اور عوام کو چاہیے کہ وہ محکمۂ قانون و انصاف کی جانب سے فراہم کردہ قومی لوک عدالت کے اس موقع سے فائدہ اٹھاتے ہوئے اپنے تنازعات کا جلد از جلد حل حاصل کریں۔

ایس پی ڈاکٹر وینیت نے بتایا کہ ضلع کے پولیس افسران اور عدالتوں میں فرائض انجام دینے والے پولیس اہلکار قابلِ تصفیہ مقدمات کی نشاندہی کرتے ہوئے متعلقہ دونوں فریقین سے رابطہ کریں گے اور کاؤنسلنگ کے ذریعے انہیں لوک عدالت کے توسط سے مقدمات کے حل کے بارے میں آگاہ کریں گے۔

انہوں نے کہا کہ جو افراد اپنے مقدمات کو باہمی رضامندی اور سمجھوتے کے ذریعے حل کروانا چاہتے ہیں، وہ متعلقہ پولیس افسران یا عدالتوں میں فرائض انجام دینے والے پولیس اہلکاروں سے رابطہ کریں۔

ایس پی نے کہا کہ لوک عدالت کے ذریعے متاثرین کو فوری انصاف فراہم ہونے کے ساتھ ساتھ دونوں فریقین کے درمیان تنازعات کا پُرامن اور باہمی رضامندی پر مبنی حل ممکن ہوگا۔ انہوں نے عوام سے اپیل کی کہ وہ اس موقع سے بھرپور استفادہ کرتے ہوئے اپنے قابلِ تصفیہ مقدمات کو مفاہمت کے ذریعے حل کروائیں اور پُرسکون زندگی گزاریں۔